ԱԽ քարտուղար Արմեն Գրիգորյանը հանդիպել է Կեստուտիս Բուդրիսի, Կեստուտիս Լանչինսկասի, Գալինա Վաշչենկայտեի և Մանտաս Ադոմենասի հետ

09 / 11 / 2022

Նոյեմբերի 9-ին Լիտվայի Հանրապետություն աշխատանքային այցի շրջանակներում ԱԽ քարտուղար Արմեն Գրիգորյանը հանդիպել է Լիտվայի նախագահի Ազգային անվտանգության գլխավոր խորհրդատու Կեստուտիս Բուդրիսի, Լիտվայի վարչապետի՝ Ազգային անվտանգության խորհրդատու Կեստուտիս Լանչինսկասի ու Արևելյան հարևանության ու ժողովրդավարության խթանման հարցերով խորհրդատու Գալինա Վաշչենկայտեի ու Լիտվայի Արտաքին գործերի փոխնախարար Մանտաս Ադոմենասի հետ:

Զրուցակիցները քննարկել են Հարավային Կովկասում ու Հայաստանի շուրջ առկա անվտանգային մարտահրավերները և մտքեր են փոխանակել երկուստեք հետաքրքրություն ներկայացնող միջազգային ու տարածաշրջանային օրակարգի մի շարք հարցերի շուրջ։ Վերոնշյալի շրջանակներում քարտուղար Գրիգորյանը զրուցակիցներին է ներկայացրել Հայաստանի Հանրապետության շուրջ ստեղծված անվտանգային մարտահրավերները և դրանց լուծման ուղղությամբ Հայաստանի տեսակետներն ու դիրքորոշումները:

Հանդիպման ընթացքում զրուցակիցներն անդրադարձել են հայ-լիտվական երկկողմ օրակարգին վերաբերող մի շարք հարցերի և մտքեր են փոխանակել երկկողմ հարաբերությունների զարգացման հեռանկարների շուրջ: Գոհունակությամբ ընդգծել են վերջին շրջանում առավել ակտիվացած Հայաստան-Լիտվա քաղաքական երկխոսության բարձր մակարդակը: